Inden inhoude van desen tegenwoordighen openbaren instrumenten zij condt ende kennelyck eenen iegelycken dat inden jaere der geboorten desselffs ons Heeren duysent vyffhondert twee en tseventich style van Roomen ter vyftiensten indictien tsPausdoms onder alderheijlichste vaders heeren Pij [= Pius V - Mich. Ghislieri] die vyffste paus van dyen name indensevensten jare synre coronatien opten negensten dach der maent Martij voor mij notario openbawr ende den getuijgen naebeschreven in propre persoonen verschenen ende gecompareert is de eersame voorsichtighe maget Anna dochtere wylen Reijners Potteije sieck naeden lichaem nochtans haers verstants memorie ende vijff sinnen in alles wel machtich ende gebruijckende, gelijck eenen iegelycken haer aensiende ende gehoorende preecken claerlijck blycken mochte – Ende heeft in alder bester formen vuegen ende manieren als sy best coste van allen haren tydelycke goederen, gemaeckt ende geordineert haer testamente lesten ende vijtersten wille verclaert inne vuegen naebeschreven ierst ende voor als wede[r]roepende casserende ende te niet doende alle andere instrumenten, codicillen, leste ende uytertsen wille by haer voor dato van desen, tsij voor notaris ende getuijgen ofte enige andere autenticque persoonen in eenkige manieren gemaeckt ende uytgesproocken willende ende uyterlyck begerende dat alleen dit [114] haer tegenwoordich testament lesten ende uijtersten wille achtervolght ende van weerden gehouden sal worden, hetsij bij crachte van testamente codicillen lesten ende uijtersten wille oft alsulcke andere midts den welcken iemandts stervende mensche testament lesten ende uijtersten wille alderbest van werden gehouden ende achtervolgd mach worden – Niettegenstaende alles wes men hier in behoorden t’onderhouden ende achtervolgen, niet geheelyck onderhouden noch achtervolght en weere, oock niettegenstaende eenighe previlegien costuymen, herbrengen, stadt ofte landtrechten desen
Inden eersten die voors. testatrix haer siele alsse van haren sterffelycken lichaem gescheyden sal syn beveelende der Barmhartigheijt Godts, Maria synen gebene dijder moeder altijt maget met allen Godts heyligen ende haren dooden lichaem der gewyder aerden begerende haer begraeffenis inden Convente van de Predicaren met een tamelyck eerlijcken vuijtvaert haren staet competerende met driendertich wasschen karsschen het stuck twee ponden, de welcke men sal distribueren ende uytreycken tot Godts dienst in kercken ende godtshuysen alhier binnen deser stadt ende buyten hier by omtrent liggende, heeft in recognitiën van ]114r] haren patroon besedt ende gemaeckt der fabrycken van St.Jan Evangelisten kercken in sHertogenbossche vier stuijvers eens in plaets van haer onbekent entrechtvaerdich goet – item die voors. testatrix heeft gewilt datmen haer nae sal doen ende lesen drie dartichste d’een ter Predicaren d’ander ter Minderbroederen ende het derde bij Heer Jannen haeren broedere oft bij iemanden anders daert den executoiren van desen gelieven sal, besettende voor elck dartichsten twee gulden eens twintich stuyvers voor elcken gulden altijt in desen te rekenen – Item die voors. testatrix besedt den Convent der Predicaren ses gulden eens tot eender bystant van spys ende dranck opten dach van haerder uytvaerden ende daertoe elcken conventuael van allen den cloosteren binnen deser stadt, tot Boxtel, Eyckendoncq, Coudewater ende Sint Annenborgh een schoon broot van een halff oort stuijver eens – Item beseth noch den Convent vande Predicaren ses gulden eens, daer voor datmen haren naem sal lesen om voor haer siele te bidden in allen sermoenen die in ses jaeren nae haeren sterffdach aldaer geschieden sullen – Item die voors. testatrix beseth den selven Convent vande Predicaren vyftich gulden eens off een jaerlycse rente daer voor voor den welcken den conventuaelen des selve [115] convents jaerlicx sullen houden haer jaergetijt – Item die voors. testatrix