Mijn Studiezaal (inloggen)220.37 Index Beurzenstichtingen (220.37)
46a [VERVOLG AKTE] Ende sullen die regeerders ende toesienders voirs. alsdan d’openstaende ende vacerende plaets met eenen anderen scholier moegen vervullen ende suppleren – ende inne dyen de voirs. conventualen des vs. convents van den predickheeren vs. by heuren versuymenisse anders verruymden de plaetsche van den scholier een halff jaer te laeten vaceren ende op te staen buyten jaer der probatien als voirs. staet – Soe soude die selve comventualen van de predickheeren voors. voor alsulcken verruyminghe den pater van de fraters ten tyde wesende moeten geven sess rynsgulden eens den gulden tot twintich stuyvers gereeckent ende voirde verruyminge van een geheel jaer negen der gelycke guldens – item die voirs. prior sal ter taeffelen gehouden syn op Ste. Dominicus ende Thomas dagen alle jaer te nooden den Mr. hunder scholen ten tyde vanden voirs. scholier ten eynde dat die selve meester te beter toesicht mach hebben totten selven scholier – ende waert saecke dat tconvent van der predickheeren der voirs. stadt egeen plaets en hadde omme den voirs. scholier in heuren voirs. convente te moegen ontfangen soo sal alsdan die prior ten tyde wesende des voirs. convents van de predickheeren den vs. scholier promoveren aen den convente van de predickheeren van Bruessel oft Utrecht ophoudende ten sy dat die voirs. scholier van eenighe vande selven convente van Bruessel oft Utrecht plaets hadde – Item des vs. syn lynwaet sal telcker reysen byder wasser des voirs, convents van de predickheeren binnen voirs. stadt van ‘sHertogenbossche gewassen worden tconvent van den predickheeren des lestgeschreven stadt sal alle jaer geven 10 stuyvers ter omderstant van den vs. scholier schoelgelt inne soo verre dat d’ouders des scholiers arm waeren ende anders nijet – item die ouders oft die naest vrienden des scholiers sullen den vs, scholier gehouden syn heur eygene costen aen te doen maecken een cleyn grauen tabbartken streckende ten ….schenen des selven scholiers beneden toege…..
Vervolg:
gemaeckt synde naede aude usantie van den fra…. met welcker grauen tabbartken die voirs. scholier des verbonden sal wesen te gaen ende te staen daeghlycx gelijck die voors. conventualen soo voor hen selven als mede van wegen elck andere conventualen der selve convente soo voor hen selven als mede van wegen alle andere conventualen des selve convents openbaerl[yck] bekennen ende onder verbyntenisse van allen den goeden des selve convents present ende toecomende voor soo veele den selven convente macht den voirs. heeren ende meesteren Jacoppe van Sundert hebben geloeft met conditiën …. toegedaen dat die voirs. conventualen des vs. convents van den predickheeren der stadt van ‘sHertogenbossche ten eewigen daeghen tsaemen tenemael altyt sullen moeghen ;ossen ende affquyten den laste van te onderhouden ende alimenteren den voirs. scholier aen handen ten tyde der voirs. regeerders ende toesienderen des selve scholiers metter sommen van vyffhondert gulden Carolus gulden gemeynl[ick] genoempt tweyntich penningen stuyvers gemeynl[ick] genoempt oft die weerde der selver in anderen goeden gelde ten tyde der lossinge alsulcken last voor elcken alsulcke gulden te reeckenen – Gelyck die voirs. Heer en Mr. Jacop van Zundert dat openbaerl[ick] heeft bekent ende als schuldenaer principael op de verbyntenisse van synen persoon ende van allen synen goeden nu hebbende ende naemaels vercrygende den voirs. heeren ende conventualen des selve conventts van de predickheeren van de Bossche metter voirs. somme van vyffhondert gulden aen handen der voirs. regeerders ende toesienders affgelost ende affgequeten sal wesen, soo sullen alsdan ende indyen gevalle die voors. regeerders ende toesienders ten tyde des selve scholiers verbonden wesen de voirs. vyffhondert gulden te beleggen op goede waeldeurchdenden onderpanden en goede renthen chynssen oft pachten ten eewigen daeghen inne het voirs. fraterhuys
Vervolg 2:
den voirs. scholier tamel[ick] als voir totten religien des voors. convents vander predickheeren binnen deser stadt van sHertogenbossche gealimenteert wordende allet sonder droch arch ende list n kennisse der waerheyt soo hebben de schepenen voirs. onse segelen hier beneden aen desen brieff doen hanghen – Gegeven den vyffsten dach der maendt van december int jaer ons heeren duysent vyffthien eenendetsestich – onder stont littera conventus predicatorium in Buscoducis de con…. partum sic scriptum – onderteeckent hier onder met twee vuythangende segelen in groenen wassche, opten rugghe des brieffsnstont geschreven als volgt Heer ende Broeder Cornelis van Oisterwyck prior van den convent der Hemelsche Poorte genoempt Baseldonck ende Heer en Broeder Martyn van Roosmalen pater ten fraterhuys binnen deser stadt als regeerders ende toesienders deser fundatie, hebben bekent dat die van den convente vande predickheeren binnen deser stadt aen hen regeerders ende toesienders handen geschoten ende getelt hebben de somme van vyffhondert carolus gulden in lossinghe affquytinge van den laste hier inne genoemt by dien vanden selven convente van de predicheeren eertyts aengenoemen in desen contract begrepen de welcke somme van vyffhondert gulden de voirs. twee regeerders ende toesienders met assistentie des priors des convents vande predicheeren voirn. hennen mederegeerder ende toesiender sullen beleet worddende op goede sufficiënte onderpanden naer behooren – dit staet oock aldus geteeckent int protocol inde marge daer desen brieff staet geregistreert – actum den tiensten dach decembris xvi c thien ondertekent by my P.Hees – gecollationeert tegens syne originaele besegelde bryeffven ende daer mede concorderende bevonden attestere ick Guiliam Donckers als openbaer notaris binnen sHertogenbossche residerende desen oirconde – Guiliam Donckers nots. s.s.t.
Persoon in schepenakte:
Broeder Cornelis van Oisterwyck
Broeder Martyn van Roosmalen
Jacop van Zundert
Guiliam Donckers
Datering:
5.12.1561
Pagina:
184-189
Soort akte:
Ontvangst
Plaats:
's-Hertogenbosch / Zundert / Brecht
Toegangsnummer:
220
Inventarisnummer:
Bron:
Beurzenstichtingen
Geografische namen:
1 gedigitaliseerd