Notaris-, schepen- en andere akten

185 Derick van Drijell hem sterck makende voor sijne kijnderen heeft geleden ende bekant dat Vincent Lambers hem wel ende ten vollen affgelost ende gequitten heeft een malder rogge erffelijck metten verloopen van dijen , dwelcke den selven hem tot noch toe gegolden heeft vuijtter eenen halven mergen lants int Hollanderbroick aen den Roijendijck gelegen, metten eenre sijde beneven Jan Guerts erf, d’ánder sijde Melis Rutten erf, d’een eijnt opten Roijendijck, ende ’t leste eijnt op Jan Tijssen erf, in eenen meerderen pacht van 3 malder rogge jaerlicx vermogens den erffbrieve daervan sijnde, luijdende van woort tot woort als hierna volght: Wij Peter van Kessel ende Herman van Trijest heijmraden int Hollanderbroick tugen samelick in desen open brief dat voor den richter ende voir ons als in de gerichte comen sijn Peter van Kessel vurschreven Derick sijn swaiger ende Met sijn wettig wijff, Jan Artssen ende Wette sijn wijttige wijff ende Truij Petersdochter vurschreven ende Jan sijn soin, een ijgelic vrouwe persoon mit oiren gecoren momber die den mit recht ende vonnis gegeven waert, . Ende hebben samentlick opgedragen mit dijs richters hant gestedicht ende gevest Henrick van Kempen ende sijnen rechten erven, 3 malder rogge Graafsche maeten erffelick ende alle jaer toe betselen op St Petersdach ad Cathedram naist toecomende nae datum dijs brieffs, uuter hoifstadt aen den Roijendijck 3 mergen lants luttel mijn of meer gelegen metter eenre sijde neven Arnt Hermans, metter ander sijde neven erf Jan Vogell, mitten eene eijnde schietende opten Molendijck, mitten andere eijnde opten Vaerdijck; voir opgedragen ende halmelick daernae op vertegen tot behoef Henricx van Kempen vurschreven ende zinen rechten erven; dat ’t vonnis wijsden dat Peter van Kessel mitten vurschreven personen ende oire alre erve dair samentlick aff onterfft ende ontgoet sijn als recht is. Ende Henrick van Kempen vurschreven ende zinen rechten erven daeraen gestedicht ende gevest sijn als recht is;