Notaris-, schepen- en andere akten

273 Wij Goirt van Mameren ende Gerit Voet Airtss, Scepenen, tugen dat voir ons comen is ULANDT DE COCK, ende heeft opgedragen ende mits deesen scepenen brieff opdreget JANNEN DE COCK JANSS, de helfft van eenen hoff gelegen inder prochie van MEGEN, ongescheijden ende ongedeijlt, deen sijde de gemeijn straet, dander sijde Heijlwich weduwe Jan Goessens met hoiren kijnderen, deen eijndt Henrick Berwer, dander eijndt Jan van Altforst met meer anderen.
Ende Ulandt voirs. heeft halmelick vertegen opte voirs. helft vanden voirs. hoff tot behoeff Jans voirs., gelovende Ulandt voirs. op hoir ende op alle hoir goet, hebbende ende vercrijgende, de voirs. helft te weren etc., wtgenoemen de helfft van een roeij dijcx, Henrick van Hemerts erffgen. boven, Jan Heijckman beneden, ende de helft van vijff stuver jairlicx den Heir tot thijns, ende de helft van een blanck jairlicx tot een memorie, ende weteringe ende tochgraven met recht.
Actum anno XLIII, den XXIIIIen van meert.
Coram eisden is comen JAN DE COCK voirs. ende heeft gelooft op hem ende opte helft vanden voirs. hoff, ende voirt op alle sijn goit, hebbende ende vercrijgende, te betalen jairlicx aen METKEN AIRT DE COX dochter, de helft van alsulcken twelff stuver als sij jairlicx heeft geldende wter voirs. helft vanden voirs. hoff, ende alnoch aen HEIJLKEN MEUS tot RETHIJ de helft van alsulcken eenen gulden, als de voirs. Heijlken wter voirs. hoff heeft geldende, alsoe dat ULANDT noch hoir erven, nu, noch tot geender tijt, dair schaij oft commer aff crijgen en sal.
Actum ut supra.

271 Wij Gerit Jan Roeloffs ende Gerit Voet Airtss, Scepenen, tugen dat voir ons comen is GERIT LAMBERTSS, ende heeft bekent schuldich te sijn erffelick ende alle jair RUTGER DIRICXZ VAN GREVENBROECK, eenen gulden, twintich stuver voirden gulden, wair aff den iersten taeldach sijn sal op St. Geertruijden dach anno XLIIII, ende soe voert alle jair, wt eenen halven mergen landts oft dair omtrent inder prochie van MEGEN opten GAETACKER, deen sijde Jan van Driel, dander sijde Jan de Paz, deen eijndt Jan Voet met meer anderen, dander eijndt Jan Goessens met meer anderen, ende voirt wt alles goits dat Gerit voirs. heeft ende vercrijgen mach, wt te peijnden alle jair gelijck verwonnen. Op conditie dat hijt altijt lossen mach met sesthien gulden ende metten pacht, twintich stuver voir elcken gulden.
Actum anno XLIII, den Ven van meert.

270 Wij Goirt van Mameren ende Herman Botterman Janss, Scepenen, tugen dat voir ons comen is JAN JAN GOESSENSS, ende heeft bekent schuldich te sijn erffelick ende alle jair METTEN HEER AIRT SPIERINCX dochter, twe gulden, twintich stuver brabants gevaluweert voir elcken gulden, wair aff den iersten taeldach sijn sal opten Heijligen Kersdach nae datum van deesen, ende soe voirt alle jair, wt eenen hoff ende bogairt die Jan voirs. vande voirs. Met gecoft heeft, gelegen inder prochie van MEGEN, deen sijde Peter Airtss, dander sijde den winterdijck, deen eijndt de pastorij ende custerije tot Megen, dander eijndt de Buijten straet, ende voirt wt alles goets dat Jan voirs. heeft ende vercrijgen mach, wt te peijnden alle jair gelijck verwonnen schult. Op conditie dat hijt altijt lossen mach met dertich gulden ende metten pacht, twintich stuver brabants gevaluweert voir elcken gulden.
Actum anno XLIII, opten XIIen februarij.

268 Wij Gerit Jan Roeloffs ende Daniel van Deijsen Janss, Scepenen, tugen dat voir ons comen is JAN JAN GOESSENS, ende heeft bekent schuldich te sijn erffelick ende alle jair BARTHOLOMEUS VAN KEEKEN, drie gulden, twintich stuver brabants gevaluweert voir elcken gulden, wair aff den iersten taeldach sijn sal opten Heijligen Paessdach XLIII nae datum van deesen, ende soe voirt alle jair, wt eenen halven mergen landts off daer omtrent, opten GAET ACKER, deen sijde Bernt Henricx kijnder, dander sijde Jan de Cock, deen eijndt Gerit Lamberts, dander eijndt het Meir steegsken, ende voirt wt alles goits dat Jan voirs. heeft ende vercrijgen mach, wt te peijnden alle jair gelijck verwonnen schuldt. Op conditie dat Jan altijt lossen mach als hijt ierst een halff jair te voiren opseeght met vijfftich gulden ende metten pacht, twintich stuver brabants gevaluweert voirden gulden.
Actum anno XLII, den XXVen januarij.
Coram eisden is comen HEIJLWICH weduwe JAN GOESSENSS, ende heeft bekent schuldich te sijn erffelick ende alle jair JANNEN JAN GOESSENSS hoeren soen, anderhalven gulden, twintich stuver brabants gevaluweert voir elcken gulden, wt hoir helft van een stuck erffs, geheijten den OEIJ, noch ongescheijden ende ongedeijlt, deen sijde de Maes, dander sijde ende deen eijndt de winterdijck, dander eijndt der stadt Cuijlen, ende voirt wt alles goits dat Heijl voirs. heeft ende vercrijgen mach, wt te peijnden gelijck verwonnen schult. Op conditie dat Heijlwich voirs. altijt lossen mach als sijt ierst een halff jair te voiren opseeght met vijffentwintich gulden ende metten pacht, twintich stuver brabants gevaluweert voir elcken gulden.
Actum ut supra.