Notaris-, schepen- en andere akten

258 Wij Goirt van Mameren, Willem Seberts ende Daniel van Deijsen Janss, Scepenen, tugen dat voir ons comen is CATHERIJN weduwe MEESTER HENRICX VAN ZWOL, ende heeft hoir doen richten ende peijnden met eenen scepenen brieff van Megen, etc. Niet afgemaakte akte.
Voir Sebert, Goirt ende Willem, Scepenen, heeft de Scholtet tslants van Megen CATHERIJNEN met vonnis ende recht ingeset inde voirs. onderpanden, ende gebiet hoir ban ende vreede etc.
Actum anno XLII, den XXVII junij.

257 Coram eisdem is comen JAN VAN DRIEL GERITSS, ende heeft bekent schuldich te sijn erffelick ende alle jair LIJSKEN MAES DE CAELS dochter, eenen gulden, twintich stuver brabants gevaluweert voirden gulden, wair aff den iersten taeldach sijn sal op St. Jans Baptist dach nae datum van deesen, ende soe voirt alle jair, wt een stuck erffs gelegen inder prochie van MEGEN opten GAETACKER, deen sijde ende deen eijndt Herman Botterman, dander sijde Gerit Lamberts, dander eijndt Dirick van Hemert, ende voirt wt alles goets dat Jan voirs. heeft ende vercrijgen mach, wt te peijnden alle jair gelijck verwonnen schult. Op conditie dat Jan altijt lossen mach als hijt ierst een halff jair te voiren opseeght met vijffthien gulden ende metten pacht, twintich stuver brabants gevaluweert voir elcken gulden.
Actum ut supra.

254 Wij Gerit van Mameren ende Willem Sebertss, Scepenen tot Megen, tugen dat voir ons comen is LAMBERT WIJERSS, ende heeft bekent schuldich te sijn erffelick ende alle jair THOMASSEN, GERITKEN, JANNEN ende GERITKEN echter kijnderen DIRICX VAN MAMEREN ende MECHTELT sijnder huijsvrouwen, twe gulden, twintich stuiver brabants gevaluweert voir elcken gulden, wair aff den iersten taeldach sijn sal over een jaer nae datum van deesen, ende soe voirt alle jair, wt huijs ende hoff, gelegen binnen MEGEN, tegen de CAPEL over, deen sijde ende deen eijndt Neeken Ariaen van Hemerts dochter, dander sijde Meus de Ketelbueter, dander eijndt de gemeijn straet, ende voirt wt alles goets dat Lambert voirs. heeft ende vercrijgen mach, wt te peijnden alle jair gelijck verwonnen schult. Op conditie dat Lambert voirs. dat altijt lossen mach als hijt ierst een halff jair te voeren opseeght met dertich gulden ende metten pacht, gerekent twintich stuver brabants gevaluweert voir elcken gulden. Ende mede op conditie als Thomas, Jan, Geritken ende Geritken voirs. hem dat een halff jair te voeren opseggen, dat hijt dan lossen moet gelijck voirs.
Actum anno XLII, op Onser Liever Vrouwendach Visitationis.

253 Wij Sebert Claess ende Willem Sebertss, Scepenen, tugen dat voir ons comen sijn JAN BERNTS, JAN sijn soen, BERNT sijn soen ende DIRICK sijn soen, ende die voirs. drie soen geloven voir METKEN ende ENGEL hon susteren, hebben tsamelijck erffelijck vercoft LAMBERT WIJERSS, een huijs ende hoffstadt, gelegen binnen MEGEN tegen de CAPEL over, deen sijde ende deen eijndt Neesken Ariaen van Hemerts dochter, dander sijde Meus Ketelbueter, dander eijndt de gemeijn straet.
Ende Jan Bernts voirs., ende Jan, Bernt, Dirick sijn kijnderen als voir hon selven ende van weegen hoiren susteren voirs., hebben dat voirs. huijs ende hoffstadt Lamberden voirs. voir opgedragen ende nae halmelick dair op vertegen tot behoeff Lamberden voirs., alsoe dat sij vertijders dair aen ont erft sijn, ende Lambert voirs. dair vast aen geerft is, gelovende sij vertijders voirs. op hon ende op alle honne gueden, hebbende ende vercrijgende, dit voirs. huijs ende hoffstadt te weiren jair en dach ende ewelick als een vrij erve, wtgenoemen eenen halven gulden jairlicx den Heir.
Actum anno XLII, den XXVen junij.