Notaris-, schepen- en andere akten

245 Wij Gerit Jan Roeloffsz ende Herman Botterman, Scepenen, tugen dat voir ons comen is DIRICK PEEL, ende heeft opgedragen ende mits deesen scepenen brieff opdreget DRIES CORNELISS, twee scepenen brieven ende dinhalt der brieven, dair deesen scepenen brieff doir is gehangen met een transfixie, mentie makende van een huijs ende hooffstadt gelegen binnen MEGEN, met sijden ende eijnden als dat begrijpt den principael brieff.
Ende Dirick voirs. heeft halmelick vertegen opte voirs. brieven ende opt inhalt der selver tot behoeff Driess voirs., etc.
Actum anno XLII, den XIIen van meije.
Gelovende Dirick voirs. op hem ende op alle sijn goet, alle commer van sijnen twegen dair in aff te doen.

244 Wij Ariaen van Hemert ende Herman Botterman, Scepenen, tugen dat voir ons comen is GERIT TALHOLT GERITSS, ende heeft opgedragen ende mits deesen scepenen brieff opdreeget DIRICK PEELEN, eenen scepenen brieff van Megen ende dinhalt sbrieffs, dair deesen brieff doir is gehangen, mentie makende van een huijs ende hoff gelegen binnen MEGEN, met sijden ende eijnden als dat begrijpt den voirs. scepenen brieff, etc.
Ende Gerit voirs. heeft halmelick vertegen opten voirs. brieff ende opt inhalt sbrieffs tot behoeff Dirick Peel en voirs.
Actum anno XL, den Xen novembris.

243 Wij Gerit Jan Roeloffsz ende Herman Botterman, Scepenen, tugen dat voir ons comen is DRIES CORNELISS, ende heeft bekent schuldich te sijn erffelick ende alle jair DIRICK PEELEN, twe gulden, twintich stuver voir elcken gulden, wair aff den iersten taeldach sijn sal opten meij dach alsmen sal scrijven XVc vier en veertich, ende soe voirt alle jair, wt huijs ende hoff dat Dries voirs. vanden voirs. Dirick Peelen gecoft heeft, deen sijde Willem Wiggers, dander sijde Jan de Cock, deen eijndt Neesken weduwe Adams van Hinsberch, dander eijndt de gemeijn straet, ende voirt wt alles goets dat Dries voirs. heeft ende vercrijgen mach, wt te peijnden alle jair etc. Op conditie dat sijt altijt lossen mach met dertich gulden ende metten pacht, twintich stuver voir elcken gulden.
Actum anno XLII, en XIIIen van meije.

242 Wij Sebert Claess, Willem Seberts ende Herman Botterman, Scepenen, tugen dat voir ons comen is, JENNEKEN weduwe ROELOFF JANSS, ende heeft hoir met scepene gelooffte doen richten ende peijnden aen allen gueden, reede ende erve als GOERT DE BUES, als medevenit der visscherije, heeft liggende ende ruerende inden lande van MEGEN, als voir tgene dat hij van sijn aendeel vanden pacht vander visscherije schuldich is. Ende Jenneken voirs. heeft hoir gerichte ende peijndinghe al volvuert.
Actum den XVen novembris anno etc. XLI.
Coram eisden is comen JENNEKEN voirs., ende heeft hoir doen richten ende peijnden met scepene gelooffte, aen allen gueden, reede ende erve ALAIRT VAN DEIJSEN JANSS,. als mede borge der visscherije, heeft liggende ende ruerende inden lande van MEGEN, als voir tgene FLORIS HENRICXZ, als medevenit der visscherije van sijnen aendeel vanden pacht schuldich is. Ende Jenneken voirs. heeft hoir gerichte ende peijndinghe al volvuert, als recht is, alsoe etc.
Actum ut supra.
Wij Sebert Claess, Gerit Roeloff ende Goirt van Mameren, Scepenen, tugen dat voir ons comen is, de Scholtet tslants van Megen, ende heeft met vonnis ende recht ingeset JENNEKEN voirs. in allen gueden, reede ende erve, als GOERT DE BUES LAMBERTSS, heeft liggende ende ruerende inden lande van MEGEN, als voir tvoirs. etc. Ende die voirs. Scholtet gebiet hoir ban ende vreede, etc.
Actum XLII, den lesten aprilis.
Coram eisdem heeft de Scholtet voirs. de voirs. JENNEKEN ingeset met vonnis ende recht, in allen gueden, reede ende erve, als ALAIRT VAN DEIJSEN JANSS voirs. heeft liggende ende ruerende inden lande van MEGEN, als voir tvoirs. etc. Ende die voirs. Scholtet gebiet hoir ban etc.
Actum ut supra.